العجوز المحتالة

المحتالة , العجوز

العجوز المحتالة

[align=center][tabletext="width:70%;background-color:white;border:7px groove green;"][cell="filter:;"][align=center]



بسم الله الرحمن الرحيم

صلوا على محمد اللهم صلي وسلم على رسول الله

القصه هي من قصص العجايز المحتالات

هنا هاك الواحد والواحد الله في سماه العالي وهالواحد متزوج هاك الحرمة ورزقهم الله ببنية هي ثمرة هالزواج
ولاجتهم الا بعد ماأصبح الزوجين يتخطون الكهوله الى مرحلة الشيخوخة قدر رب العزة والجلال على الاب
وتوفي الله يرحمه وكان وظيفته جندي بالحكومه وياخذ راتب ثلاثين ريال تعيشه هو وحريمته وبنيته بحدود الكفاف...
وكانوا راضين ومستقرين وماعندهم للشيطان طريق
اييييييه قطع راتب الاب بعد وفاته وبقت الام وبنيتها بلا عائل ولا مورد للرزق !!
فكرت الام وشلون تشتغل وهي كبيرة في السن؟؟!!
وشلون بتعيش هالبنيه وهي أملها بعد الله بهالحياة
وفكرت ليال وايام لكن مافيه حل الا انها ترجع راتب ابيهم لكن وشلون صغار الموظفين مالهم مقدريه ولابيديهم حل ولاربط
ومافيه الا رجال واحد هواللي يقدر يرجع راتب ابيهم
هوالسلطان!!!
مير(لكن) وشلون تاصل للسلطان وهي عجوز مافيه من ينظر لها ولا من يسمع شكواها
الاانها ما يأست وصار هالامر شغلها الشاغل
بليلها ونهارها بسرها وجهارها!!!لازم انها توصل للسلطان توضح امورها ووضعها
والوصول للسلطان بالطرق العاديه مستحيل هذا اذا ماكان محال
اييييييييه الحين وش تسوي سواة ربي أبرك

وأخيرا وبعد طول تفكير لقت لها طريقة هي أن تسوي
مثل المثل اللي يقول(إذا اردت أن تذكر فأعمل المنكر)
لكنها ماهي مسوية منكر يضر شرفها ولا يكون عار عليها وعلى بنيتها
لكن به طريقة أن شاء الله بتوصلها ولا تضر بشرفها
وهي أن تدعي السيادة والتظاهر بالدين والالتزام!!
تحط لها مسبحه وسجادة وانتم تعرفون الباقي
لبست على راسها عمامه خضراء علامة السياده ..
وأخذت أبريق معبأ بالماء .. وراحت في واحد من شوارع المدينه يوم جاء وقت صلاة الضحى
كانت بقرب بيت وزير السلطان .. دقت الباب فتحت لها جاريه من الجواري العبدات المملوكات فقالت العجوز :
انا حرمة كبيره ومتعوده أصلي صلاة الضحى في هذا الوقت.. تسمحين لي أدخل أتوضأ وأصلي ثم اروح بحال سبيلي
اييييييييه فتحت الجاريه الباب وأشارت الى مكان تتوضأ به العجوز واشارت لمكان الصلاة
وخلصت مصليه وجات بتطلع وكانت جايبه معها قطعه من النقود الذهبيه ثميييييينه ويوم جت بتطلع رمت بهالقطعه بالبيت وكأنها طاحت منها من غير ماتدري
واخذتها الجاريه وقلبتها وشافتها ثمينه واركضي يالجاريه تلحق العجوز قالت هذه طاحت منك
فقالت العجوز وش حاجتي للذهب انا سيده لونفخت ببريق الماء صار ذهب خذيها يابنتي حلال زلال طلعت العجوز وراحت الجاريه لعمتها زوجة الوزير
وعلمتها باللي حصل!!
وكانت زوجة الوزير عاقر ماكتب رب العزة والجلال لها ذريه وهالحاله مشغلة بالها ومنكده عيشتها وماتركت علاج للعقم الا أستخدمته لكن مافادها شئ
فرحت زوجة الوزير يوم سمعت بهالعجوز وقالت للجاريه أتبعي آثارها بسرعه وأرجعيها فلعلي ألاقي على يدينها علاج لحالتي اللي مشغلتني ومشغلة زوجي
طلعت الجاريه تركض عاضه شليلها( أي طرف ثوبها تشبيه على السرعه)ولحقت العجوز قالت عمتي تبغاك تبي تستشيرك بامر يتعلق بصحتها ورجعت العجوز مع العبده
وجلست مع زوجة الوزير بمجلس مافيهاالاثنتين أفضت زوجة الوزير بحالتها للعجوز وطلبت علاج لحالها!!
فقالت العجوز ان هالحاله سهلة وعالجت امثالك كثيييييييير ورزقوا ببنات واولاد وعاشوا ومع ازواجهم بسبات ونبات
قالت اسمعي ماعليك الا تحددين يوم أجيئ لك فيه وآ خذك لبيتي لان هناك عدتي وادواتي ومايمكن نقلها
وتروحين معي والوقت ماهومستغرق اكثر من ساعه
فرحت زوجة الوزير قالت ابي العلاج باسرع وقت
قالت العجو متى مابغيتي انا جاهزه واخذك وارجعك لبيتك براسي وبصحه وعافيه
قالت الزوجه اذا طلع زوجي الساعه ثلاث ويروح للسلطان اجي معك
قالت العجوز حبا وكرامه وقالت لازم تلبسين احسن ملابسك وتلبسين
حليتك وتكونين بكامل زينتك قالت علاج اللي مثلك لازمه مظهر زين ومتناسق
وعدتها زوجة الوزير بكل شئ طلبته


يتبـــــــــــــــــــــع


[/align][/cell][/tabletext][/align]

[align=center][tabletext="width:70%;background-color:white;border:7px groove green;"][cell="filter:;"][align=center]

طلعت العجوز من عندها وراحت عند واحد يبيع ملابس حريم وسلمت عليه
وقالت له انا عندي بنت جمييييله انا أرد الخطاب عنها لكن توسمت فيك الخير والوفاء والنجابه!!
ووقعت عيني عليك من مده وتوقعت ياصلك خبر جمال بنتي فتجي تخطبها بنفسك لكن مااردته لم يكن ولم يحصل
ومابقى الا ان اخطبك انت لابنتي ففرح هالتاجر بهذا الرزق
اللي ساقه رب العزة والجلال له بلا سعي وبلا جهد
وافق على الخطبه قالت العجوز ان كانك على استعداد
فجب معك هدايا وتحف لعروسك اللي ابيك تشوفها قبل تعقد عليها
فان اعجبتك كملنا كل شيئ والا فرزقك على الله وهي رزقها على الله
وافق التاجر واتفقوا على الموعد المحدد..

وراحت العجوز الى صاحب منزل للايجار وفرشت فرش زين واستاجرته لمدة أسبوع ونقدت له المبلغ
مقدما واخذت المفتاح معها..
وجاء وقت موعدهم كانت العجوز ببيت الوزير أخذت
زوجته معها و وطلبت زوجة الوزير تاخذ جاريتها معها
فقالت لها العجوز مافيه داعي فأنتِ معي وبكفالتي وماعليك خوف بعدين هالامر لازم يكون سر
بيني وبينك وعلاج مثل هذه الحاله لازمه كتمان وتستر!!
اييييييييه طلعت زوجة الوزير مع العجوز لحالهم
فقالت العجوز لزوجة الوزير امشي وراي بمسافة عشرة أمتار
واذا وقفت قفي واذا مشيت فامشي واحرصي على هالمسافه بيني وبينك !!
استجابت الزوجه لااوامر العجوز وصارت تمشي وراها واذا وقفت العجوز
وقفت الزوجه واذا مشت العجوز مشت الزوجه ومرت العجوز على صاحب دكان
فقالت له ان هذي بنتي وهي تمشي وراي بمسافة عشرة امتار ..
وانت أمش خلفها بمسافة عشرة أمتار فاذا توقفنا توقف واذا مشينا أمش!!
ايييييييييه قفل صاحب الدكان محله بسرعه ومشى وراهم وكان اخذ الهدايا والتحف معه ايييييييه
الرجل شاف اللي ابهره بجمال هالبنت وقال بينه وبين نفسه وش هالرزق اللي الله ساقه لي !!!
اهاااااااااا وصلت العجوز الى البيت فتحته ودخلت البنت باحد الغرف وقالت لها
اشلحي ثيابك وحليتك وادخلي اكرمكم الله الحمام تنظفي عن العرق والغبار اللي جاك من الطريق!!
استجابت زوجة الوزير للعجوز ودخلت واخذت العجوز حليها وملابسها ولفتهم ببقشه واخذتهم معها
وراحت للرجل قال اخلع ملابسك وادخل تنظف وتطيب ثم اطلع فتشوف بنتي بالغرفه الثانيه وبتشوفها وجها لوجه


وبتعجبك من قريب مثل ماعجبتك من بعيد
ونزع الرجل ملابسه ووضعها مع الهدايا والتحف
ودخل الحمام فاخذت العجوز ملابسه وحطتهم مع الهدايا والتحف ولفتهم ببقشه واخذتهم وقفلت الباب وطلعت
ايييييييييه خلصوا الاثنين من اعمال النظافه وطلع الرجل وراح لغرفة البنت ولاقاهاجالسه لحالها
واستغربت وجود الرجل اللي يمشي بفرح ومرح فقالت له من انت
قال انا زوجك امك زوجتني اياك !!!؟؟؟
زوجة الوزير نظيفة العرض والرجل شريف القصد ولكن العجوز خدعتهما وحطتهم بمأزق
وهم مايدرون فقالت له زوجة الوزير وقف مكانك فانت لست بزوجي انا زوجي فلان وزير السلطان
وهالعجوز ماهي والدتي وهي عجوز محتاله ماكره ولازم تكون مؤدب فانا وانت وقعنا بحبائل كيد هالعجوز
وعلينا ان نطلع انفسنا من هالورطه مستورين!!
فهي اخذت ملابسي وحليي واظن انها اخذت ملابسك
فراح الرجل يبحث عن ملابسه ولا والله مافيه شيئ
فقالت زوجة الوزير اكسر القفل واطلب من احد الماره يجيب لنا ملابس تسترنا ونطلع من هالدار اللي للكيد والخديعه!!
راح الرجل الى الباب فكسر قفله ونادى احد الماره واعطاه مفتاح دكانه
قال رح جب لنا كسوه رجاليه ونسائيه وجات الملابس واخذ كل واحد اللي يصلح له
ولبسوا وتفرقوا وهم مدهوشين من اللي صار معهم

(يتبع )


[/align][/cell][/tabletext][/align]

[align=center][tabletext="width:70%;background-color:white;border:7px groove green;"][cell="filter:;"][align=center]

أما العجوز فبعد ماطلعت من عندهم شافت طفل بالطريق واعطته حلاوه وبسكوت
فزاد تعلقه بها واخذته وراحت هي واياه عند صائغ حلي يهودي
وقفت عنده وقالت ورني بضاعتك وراح يستعرضها عليها جواهر والماس ولولو
وذهب وفضه واحجار كريمه ايييييييه اختارت كل ماهو غالي وثمين
وقالت اني ابغى هالحلي لإبنة احد كبار البلد وهي على ابواب زواج وانا لايمكن اشتريها الا اذا اعجبتها
وصارن مقاسها لاكن اترك ولدي هذا عندك لحين ما ارجع انا
بروح اقيس العروس وارجع بالمقاس واللي يعجبها واللي مايعجبها وبالقيمه ايييييييييه صدقها الصايغ
واعطاها كل اللي هي تبغاه وترك الولد عنده وراحت وطال انتظاره وطال وطال وهي ما رجعت
واهل الولد يدورون على ولدهم مالاقوه وتتبعوا اثره حتى لاقوه عند الصايغ جاءوا بياخذوه
فمانع واعترض الصايغ وقال ان امه حطته عندي حتى ترجع اللي اخذته
واخذت حلي ثمينه فقال اهل الولد الولد ولدنا وامه ماطلعت من البيت ولاجت
عندك دور على اللي اخذ حليك واخذوا الولد من الصايغ وصار يضرب كف بكف ويفكر بطريقة يسترجع ذهبه من هالعجوز
هذا كله حصل باليوم الاول من مكايد العجوز
باليوم الثاني لاقت هالعجوز بايع أصباغ وقالت له ياوليدي انا غريبه
ولااعرف السوق وبالبيت بنتي خذ هالعشر قروش اشتر لي ولابنتي فطور
اخذهم وقال للعجوز راقبي دكاني واذا جاك احد قولي الحين بيرجع وراح يجيب فطورها
ومر راعي حمار للاجار فقالت له العجوز ياوليدي اعطني مقاد الحمار وادخل كسر كل الاغراض القديمه
واريد اغيرها واجدد الاصباغ وهي فسدت من طول الزمن اللي مر عليها
ونقدت لصاحب الحمار خمس قروش ودخل الدكان وبدا يكسر الجرار المليانه
وهوغافل اخذت الحمار وراحت بعد ماحملت عليه احمال وودعت الحمار بمكان امين
وجاء صاحب الدكان وشاف الاصباغ سايل يمين وشمال
طار عقله وراح للرجل اللي يكسر فمسك بخناقه فرفع راسه وقال له ليش؟
قال امك هي اللي كلفتني واعطتني اجره فرد صاحب الدكان قال هذه موامي
هذه شيطانه ماكره لكن تعال ندور عليها بحثوا عنها و مالاقوها
وصار راعي الحمار يدور بالاسواق يدور عليها
ويدور على الحمار و بعد يومين فجأه لمح العجوز
وأسرع عندها ومسك تلابيبها وقال وين حماري
ياماكره فقالت له انا ماني ماكره وحمارك معزز ومكرم
أترك ثوبي والحقني اعطيك حمارك!!
تركها الرجل ولحقها وصار يمشي وراها وهي قدامه
حتى أقبلت على حداد فقالت للرجل خلك هنا انتظرني شوي حتى أفتح الباب وأمهد لك الطريق فتدخل تأخذ حمارك ...
ودخلت العجوز الى الحداد وقالت له ان
ولدي هذا معه ألم ووجع براسه ودماغه وكله بسبب أضراسه وأبيك تخلع كل أضراسه وتكوي
كل مكان ضرس علشان ماينزف دم قالت وهومصاب بهوس بحماره وسؤاله وين حماري وين حماري
وهو بيقول ان اسنانه سليمه ولكن الدليل أذا سأل عن حماره فهو ولدي وهذا بسبب اختلاط عقله بوجع اسنانه
وهذه عشر ريالات ذهبيه مكأفاه لك
وبعد ما اعطت الحداد المعلومات قالت لصاحب الحمار تفضل ياوليدي وشف حمارك بالغرفه المقابله
وبمجرد مادخل المسكين طب عليه الحداد وشغيلينه
وأطرحوه بالارض قال وش تبون قالوا نبي نخلع ضروسك..!!
قال انا جاي ابي حماري ماهو تقلعوا ضروسي
فقالوا له امك قالت لنا كل شيئ وسؤالك عن حمارك هوالدليل القوي على صدق كلام أمك وبدأوا يخلعون
أضراسه واحد ورا واحد واذا خلعوا ضرس كووا مكانه بالنار حتى قضوا على كل أضراسه
وبعدين تركوه بحال سبيله!!!
أيييييييه كثرت الشكاوي عند السلطان عن هالعجوز الماكره أهتم السلطان بهذا الموضوع لانها سوت في البلد خوف وبلبله
مالهم فيها عهد بمثلها جنّد السلطان كل رجاله وفرقهم على جميع المدينه يدورون على هالعجوز وعطوا كل فرقه أوصافها
واغلب الفرق من المماليك السود وامر السلطان بمكافأه سخيه للفرقه التي تجيبها زاد التنافس بين الفرق
وجدوا واجتهدوا بالبحث يبون رضى السلطان والمكافأه

(يتبع)

[/align][/cell][/tabletext][/align]

[align=center][tabletext="width:70%;background-color:white;border:7px groove green;"][cell="filter:;"][align=center]

شافوا وحده من الفرق عجوز تمشي ودققوا النظر بيتاكدون لايلقطون لهم عجوز بريئه وعندما قربوا تأكدوا انها هي
قضبوهاا وراحوا لبيت السلطان فرحانين ويتباشرون ويوم دخلوا بيت السلطان سألوا عن السلطان لاقوه نايم فقاموا
وحلقوا على العجوز حلقه متماسكه وبقت العجوز هاديه راضيه مستسلمه
وكان التعب طاغي على هالفرقه والوقت ظهر وقايله
تمددوا على الارض بيرتاحون فناموا واحد ورا الثاني دايخين تسللت العجوز من بينهم وراحت للدور الثاني
عند زوجة السلطان وسلمت عليها وقالت ارسلني سلطان المدينه المجاوره لكم بهديه من العبيد وانا ابغى اقابل السلطان ابلغه الرساله اللي حملني وأسلم الامانه له اللي جيت علشانها
فقالت زوجته ان السلطان نايم وين العبيد قالت العجوز شوفيهم وأشرت على المماليك اللي صادوها وقالت انهم نايمين من التعب والسفر الطويل
قالت زوجة السلطان اتركيهم وروحي أرتاحي في أحد الفنادق وتعالي بعد العصر تلاقين السلطان بيستقبلك
وخذي هالمبلغ عون لك في حوايجك وعطتها مبلغ كبير
اعطاه السلطان زوجته تنفق منه في المناسبات والواجبات...
طلعت العجوز وراحت لبيتها وقام السلطان من نومه
وعلمته زوجته بسالفة العجوز وهديتها وقالت شف هذولا العبيد نايمين
وقام يضرب السلطان يد بيد وقال خدعتك العجوز وباعت عليك عبيدنا وأفلتت
ثم نادى السلطان كل رئيس فرقه وفي منهم عبيد وفي منهم خدم
واعطاهم اوامره اذا مسكوها يوثقونها بالحديد والسلاسل ويصلبونها في ساحه برا المدينه
وانتشرت الفرق مره ثانيه واجتهدوا يدورون ويدورون ويدورون
ايييييييييه لحد مافرقه من الفرق مسكتها ووثقوها بالحديد والاغلال والسلاسل
وطاروا بها جهة المكان اللي برا المدينه مجهز للصلب
وبعدين راحوا يبشرون السلطان شكرهم وعطاهم المكافأه وامدحهم ومدح جهدهم
ونامت المدينه وهم يتباشرون بخبر المقبوض عليها
وجاء اخر الليل والعجوز مربوطه على عمود خشبي
خارج المدينه وماحست الا ببدوي جاي من البر اوالصحراء
مثل ماتقولون راكب راحلته ويوم مر من عندها سألها ليش مربطه قالت اني انا وصويحباتي متراهنين على 1000ريال
اذا نمت الليله بهالمكان وبهالحاله!!!
وانت وش جابك في اخر الليل للديره ؟؟؟فقال لها زوجتي ارسلتني تبي نوع من الخضروات اسمه زلابيا
قالت العجوز الزلابيا ماتباع وانا اخدمك اعرف واحد عنده كميه بسيطه فاذا انت تبيني اروح عنده اجيبها خلك بمكاني علشان ما أخسر الرهان
اعجبت البدوي الفكره بعدين البسته ملابسها ووثقته بمكانها ثم ركبت راحلته
وراحت وخلته لحد ماطلع الصباح وجاء السياف بيقطع راس العجوز
وتجمع الناس بيشوفون القصاص
وجاواالحراس بيفكون اغلالها ويسوقونها لساحة الاعدام
واندهشوا ما لاقوا الا بدوي مكانها وسالوه وش جابك علمهم بقصته كامله فكوا وثاقه وتركوه يروح في حال سبيله
وراحو يبلغون السلطان باللي حصل وزاد غضبه وهاج وصار الشرر يناقز من عيونه
قال وشلون دوله بكامل أجهزتها تعجز مسك عجوز ضعيفه ؟؟؟
المهم السلطان قال لحرسه معكم يومين اذا ماجبتوها حسابكم عسير
انتشرت الفرق بكل زوايا الديره وحوصرت العجوز وفكرت بوضعها وشلون تطلع من هالحصار
وجتها فكره تلبس ملابس تنكريه وتروح للسلطان بالقصر وتسلم عليه ولبست ومشت الى ان وقفت عند باب السلطان
قالت للحارس انا عندي خبر صادق عن العجوز اللي السلطان يدور عليها
وانا اريد ازفه اليه بنفسي علشان يكون له شرف الحصول عليها أكثر من غيره
وفرح السلطان بهذا الخبر وقال خلوها تدخل ويوم دخلت عليه كشفت عن وجهها
وقالت انا العجوز اللي تدور عليها وانا عملت كذا وكذا وكذا
وانا ما اقصد الاجرام والسرقة ولكن لي هدف وهدفي له قصه واللي اطلب من مولاي السلطان
يسمحلي اشرح وضعي فاذا شفت اني محقه صفحت عني واذا شفت اني مجرمه فعاقبني فقال يالله قصي قصتك؟؟

فقالت العجوز لي زوج يخدم عندك شرطي وياخذ راتب 30ريال
كنت عايشه انا ووحيدتي على الله ثم عليه وكنا قانعين ثم قدر الله على زوجي ومات ويوم مات قطعتوا معاشه
عني وضاقت بي الدنيا لاننا مانعرف طريق نروح له نعيش عيشة الكفاف وعزمت أقابلك اشرح لك وضعي
لكني ما قدرت وماعندي حل غير هالطريقه والان بلغت مرادي وقصيت قصتي عليك
والاعمال كلها ما اقصد بها جرم والدليل كل الاموال اللي اخذتها من الناس محفوظه عندي وفرح السلطان بهالنتيجه وارسل يوقفون فرق البحث
وامر وزيره يروح مع العجوز وياخذ كل الاموال اللي عندها وعفى عنها وصرف لها بدل الثلاثين ستين
ورجعت لبيتها فرحه مسروره

[/align][/cell][/tabletext][/align]

استمتعت بقراءة القصه كامله

يعطيك العافيه روح السراب

الله يعافيك طاش
شكرا لك على الحضور الراقي
وان شاء الله كانت قراءة ممتعة


تحياتي ،،

هههههههه سوتها العجوز واعجزت سلطان وحاشيته

قصه جميله شكرا امي على التنسيق والطرح المميز

الشكر لك ولدي العزيز على هذا الحضور

العجوز عملت بالمبداء القائل الغاية تبرر الوسيلة


تحياتي ،،

قصة طويلة لكنها رااائعة استمتعت
تسلم الايادي
يعطيك العافيه على روعه طرحك
نرتقب المزيد من جديدك

قصه ممتعه وجميله ولاكنها من نسج الخيال