منتدى الآصالة والتاريخ حريب بيحان - راحت حياتي بين طالب ومطلوب

- حريب بيحان للشعر المنقول (https://www.hreeb-bihan.com/vb/forums/hreeb46/)

- - راحت حياتي بين طالب ومطلوب (https://www.hreeb-bihan.com/vb/threads/hreeb31046/)

راحت حياتي بين طالب ومطلوب

كم راح من عمري وانا ودي أتوب
ولولا الهوى والنفس كان أمس تايب

عشرين عام أمنّي النفس بالتوب
لين اكتشفت إني مع الوقت شايب

راحت حياتي بين طالب ومطلوب
ولي خاطر(ن) لو طبت ماهو بطايب

واخاف من يوم(ن) به الموت مكتوب
لا حوّلوا بي بين عوج النصايب

في منزل(ن) مظلم عن الناس محجوب
محجوب حتى عن نسيم الهبايب

وصار الكفن يا ناس يغني عن الثوب
وفارقت ربعي والأهل والقرايب

ما عاد فيها جاه وأموال وسلوب
ولا عاد فيها حب خشم وطلايب

خدعني التسويف وأغرتني دروب
من يأمن الدنيا وغدر النوايب؟

يالله يا فارج على كل مكروب
يا واحد(ن) بامرك تهون المصايب

يا من تقلّب بين أصابيعك قلوب
خلقتها من بين صلب وترايب

يا غافر لمن جالك وكله ذنوب
عبد(ن) ضعيف وجاك تايب ونايب

يارب لو قلبي صخر عندك يذوب
يامن لهيبتك الجبل خر ذايب

أتوب ثم أعود .. وأعود وأتوب
ما هي عجيبه وانت رب العجايب

من المهد لين اللحد وقت محسوب
ما ضاع شي وما بقى شي غايب

يارب مالي غير رحمتك مطلوب
من لي سواك إن جيت يارب تايب.