منتدى الآصالة والتاريخ حريب بيحان

عشر وصايا

ابي يقول اسمع وصاتي وانا ابيك
عشر وصايا .. قادحة من شراره

من تجربة دنيا .. وجردّ مهاليك
لقاء بها الافراح عقب المراره

الاوله .. طيب النبا .. في ملاقيك
حافظ عليه .. ولا تنقص عياره*

لا تغض عينك .. لا تكلم محاكيك
عطه على جوه .. وقدرّ وقاره

والثانيه .. من جاك زابن وناصيك
قله حرست .. ودارك تصير داره

وان صاح ابن عمك فلا تقول وشفيك
افزع معه .. واصمد على كل غاره

والثالثه .. خوة هل الطيب تغنيك
ولا ضعيفين الروابع .. خساره

ومن يضحك بوجهك وهو ما يدانيك
كبه وخله يحترق .. وسط ناره

والرابعه .. لاحزت نصرك باياديك
اقنع بنصرك .. لا تعاود مساره*

لا تومي بنفسك .. بدرب المهاليك
ما اشين على الانسان كون انكساره

والخامسه .. خابرك وانا مربيك
ما ينفعك كثر اللعب .. والدواره

قلط ربوعك مجلسك يوم تاتيك
وخل الدخون يدور داير مداره

والسادسه .. رفيقك اللي يخاويك
سافر معه وتعرف ماكر حراره

اما رفيقٍ *في مماشيه يحييك
ولا فغير وجهتك عن مساره

والسابعه .. سرك يميتك ويحييك
عليك بالكتمان .. تاره وتاره

افشاء سرك .. عند من لا يراعيك
ما يرفع البنيان .. عقب انهياره

والثامنه .. من قبل آقول واوصيك
لا خير في جار مهو يحب جاره

جارك عطه روحك وما تملك ايديك
ركد له الدله .. وشب المناره*

والتاسعه .. لو يغلط بحقك .. أخيك
خذها بشحم .. وارفع مع الناس كاره

علمه ترا علمك وطاريه طاريك
فعليك به .. *لو كان ماله جداره

والعاشره .. حب الهوى جعل ما يجيك
وان جاك .. فالطف به وصونه وداره

يوم بيضحك بك .. ويوم يبكيك
ويا عزتي لك لا تعدى الستاره*

واللي عن العشر الوصايا بيغنيك
عمود دين .. ونور دربّ .. ومناره

ترى الصلاه وبس هي من تنجيك
واللي مهو يصلي حياته خساره