02-13-2017, 04:45 PM
| #11 | |
 |  رد : ديوان الشاعر حسين المحضار أقوله له ايه *********************** أقول له أيه لـو شفـت ذا يغـريه اوذاك ذا يطرح له الشمس في كفه وذا نجم السماك ينصبوله كما الوعل في الوديان لا شباك هذا من هنا قام يتحيّل وهــذا من هنــاك أعا مل مثلـهم با لنصـب لا لا واغـريه با لكلام الكذب لا لا أسوي أيه ما حيلتي الا أصارح وأصدق خاف با لصدق اتوصل اليه أقوله ايه ********************** تريده ليه قالو لي العذال ذولا ك قا لو ليش تبقى معه دايم وهو ما هو معـاك تريده ليه فك منك الغدار والفــاك با تلقى مثيلـه وهو ما با يلا قي حد سواك أصدقهم وأعصي القلب لا لا وأمشي فوق هذا الدرب لا لا اسوي أيه ما حيلتي الا اطالب بقلبي لا ن قلبي مكانه في يديه واقول له ايه نهايه الصبر لا جـاوزحدوده قتل ** قلي صبر ان رمت قتلي ما حد صبر مثلي ولا حد حمل ** في بحر حبك مثل حملي يا قاتلي قلي هل عاد شي في الحبل لفات يا ريت يرجع لي الـزمن ذاك لي فات ***************************** عقلي وفكري في هواك انشغل ** واصبحت بين الناس شغلي والعظم دقيته من اجلك وصل ** وانته قطعت اليوم وصلي في عشقتك مبلي والعشق ماهو بالدعايات يا ريت يرجع لي الـزمن ذاك لي فات *************************** يكفي اذا حصلت منك مظل ** في قصر عالي با نظلي ولا سمر لا الشهر شوع وهل ** بعيـد عن اهلك واهلي شملك مع شملي با يجتمع يكفي من اشتات يا ريت يرجع لي الزمن ذاك لي فات *************************** خـا بت محبه اخرتها فشل ** من اجلها بينت فشلي والحب بلوى يا حسين القبل ** عـذب امم قبلك وقبلي وليش متعلي شف عاد للايام نكسات يا ريت يرجع لي الزمن ذاك لي فات *************** (معاني بعض المفردات ) 1- رمت : اردت 2- في الحبل لفات : في الحبل وسع 3- مظل : الجلسه ساعة الظهر 4- اشتات : تشتت وتفرقه 5- سيبت فشلي : تركت عملي
| |
 |
|
02-13-2017, 04:47 PM
| #12 | |
| رد : ديوان الشاعر حسين المحضار إعادة الماضي الى الحاضر محال لكن قلبي ما توقع في محله إذاجيت با نسيه ذكره الخيـال واثار بقيت بعـد محبوبه وخله وفراق من تهواه وحله ما أطـول الايام بعده والليال أشوف ليلي طال يا دمعة العين جودي على حبيبي خففي بعض الذي بالبال قسى على دهري قسى بئِس الفعال اهوين كم قاسيت من دهري وفعله غصبه سقانا المر من بعـد الـزلال وفي معاداتي خطا حده وزله تفريق يعطيني وجمله وكـم يدحرجها على راسي جبـال العقـل منه مال يا دمعة العين جودي على حبيبي خففي بعض الذي بالبال أيام لي أفحس يميني عـا لشمال على حبيبي لي افترق شملي وشمله ما جا تنا من بعده الدنيا قبـال يا ريتنا سـرته معـه اوسرت قبلـه يمضي على الوقت كله في زلزله والدمع دايـم لا يزال من مقلتي سيال يا دمعة العين جودي على حبيبي خففي بعض الذي بالبال يا طيفه الميمون جد لي با لوصال بقضي معك ان عاد شي في العمر وصله تعال سـامـرنا وانسّنا تعـال وأشفي بقربك صوب في جوفي وعلــه حتى ولو في حين غفله لحظه معك احلى من الشهد الحلال وأغلى من الامـال يا دمعة العين جودي على حبيبي خففي بعض الذي بالبال أعـود له من بعد ما خانني استغفر الله لا اشتري بالود من با عني في بيع وشراه شرميه با لسهم الذي صابني به با تحداه وبعـد هذا على الماضي سـلام الله لي ما معـه عرف في بحر المحبه تـاه كم كنت انا في عشقته مبتلي أحرسه ورعـاه أفديه با لمهجه وكل مامعي من مالاوجاه وحين ما شفته تطاول علي وعرفت مغزاه قفلت بابه كاني لم اكن اهــواه لي ما معه عرف في بحر المحبه تاه غلق وتم ما بيننا كل شي حتى المحاكاه يمشي على دربه ونا با مشي في الدرب لي باه بعد الشيانه والكلام الحفي ما شي مصا فاه ولعاد شي عهد ثاني غير عهد الله لي ما معه عرف في بحر المحبه تـاه الجـود والمعروف ما ينتسي لكنه أنساه قلبه غـدا مثل الحديد القسي مغلضه مقساه حتى الحيا لي كان به مكتسي فـارق محياه من بعد ما طالت الفرقه انا وياه لي ما معه عرف في بحر المحبه تاه
| |
|
|
02-13-2017, 04:48 PM
| #13 | |
| رد : ديوان الشاعر حسين المحضار (يـابــوي أنـا) ــــــــــــــــ عـلى المحبة ياحبيبي السلام ***إن كانه إلا بالضحك والكلام لابد ماتخلص وترعى الذمام ***وتـحـفـظ الود الذي بيننا يـابـوي أنا منك يابوي أنا*** وظـهرت لي سنك وخدعتنا ________ بالأمس وليتك على كل شيء ***والـيوم تجحدنا وتقسى علي والجم في عينك تشوفه شوي ***قـلـبـك مكانه مادخله الهنا يـابـوي أنا منك يابوي أنا ***وظـهرت لي سنك وخدعتنا ________ والله وحـق الله وأم الـكتاب ***إن الأمل ياصاحبي فيك خاب ولـعاد حاجة للسهر والعذاب ***أحـسـن ننهي حبنا من هنا يـابـوي أنا منك يابوي أنا ***وظـهرت لي سنك وخدعتنا
| |
آخر تعديل بواسطة روح السراب ، 02-13-2017 الساعة 05:03 PM |
|
02-13-2017, 04:49 PM
| #14 | |
| رد : ديوان الشاعر حسين المحضار بشيش ع أم اللبن من ديوان إيتسامات العشاق للشاعر / حسين ابوبكر المحضار *** بشيش ع أم اللبن ومنيحة الأطفال تجملت شيىء فوق طاقتها من الأحمال بركت وعزوها الرجال ومكانها تضلع تداركها بكيه من مكاويك لي ماكوى فوق البخس .. بلاش كيه مايأثر فيك *** على حسب وصف الناس قالوا تسبق الخيال وتعقّب الراكب ولا يتعب بها جمال لكن أولاد الحلال طلعوا بها برع ويبغوها مطيه للصعاليك لي ماكوى فوق البخس .. بلاش كيه مايأثر فيك *** ما بايخطمها علي مادمت حي دلال ما با سمع فيها كلام الخصم والعذال باحط وباشد الرحال قبل القمر يطلع بها بسري وساعة يصرخ الديك لي ماكوى فوق البخس .. بلاش كيه مايأثر فيك *** باصبر عليها سال وادي سر أو ماسال من اجلها باعبر حسر ما تنعبر وجبال في الشمس با دعس والظلال وفي السمر باقطع وكود الراك يلقي لك مساويك لي ماكوى فوق البخس .. بلاش كيه مايأثر فيك *** نا مانسيت أيام نخرج ع كف الرمال ع ظهرها أقضي مطاليبي ورد في الحال لكنا ماقدر بحال ودع ومن ودع جماله دوب يشكين الصوانيك لي ماكوى فوق البخس .. بلاش كيه مايأثر فيك =====
| |
|
|
02-13-2017, 04:49 PM
| #15 | |
| رد : ديوان الشاعر حسين المحضار أوبريت الضحية كلمات الاوبريت مخيزم : بلا بلادي لو عيش شاوي وراعي ضــــــــــــون فرقة الدار صعبه محينه والعشق بلوه عصبه نقلني ونا في الخـــــــــــون لامثاوي ســــعاد الزبينه نا فيش حبيت يامشقاصيه رحيمة لـــــــــــــــون بعد ماشفت سيرتك زينه العروس : صابر وصبري لوهو عسل بالصبر مــــــــــوزون لا طعمته تروح كنينه مخيزم : بصبر على الجور منش وعالبخص هو والهون لنتي ترضين لي بالهوينه العروس : باشوف صبرك باجرب الصبر كيف يكــــون بيننا الوقت مطول سنينه مخيزم : وانا مـــــــن اليوم بحفظ عهودك ولا باخـــون كل من حب حد مايخينه العروس : وانت وايش قصدك في العشق قلي مالمضمون قطع تبغاه ولارهينه مخيزم : ابغاش زوجه بالعقـــــد والنقــــــــــد والماذون بانخلي العلاقه متينه العروس : كلـــــــــــــــم وليي ودفع له المــــهر والعربون والعرس بايقربه حينه مخيزم : يالله اتفقنا باكلمه مـــــــــــــــــــرحبا ولعـــــون والخبر عقب باتسمعينه وفي هذه اللحظه ياتي ابن عمها ويدخل في مشاجره معها ابن العم : من كان عندش ويقول لك ايش ذا المجنــــــــــــون قولي تكلمي يالعينه العروس : وانت وايش دخلك مشي كما الناس لي يمشــــــون وايش دخلك بيني وبينه ابن العم : نا ابن عمش مابرخصك شي لحد بالــــــــــــدون لو يجي الثعر وابن الزبينه العروس : انته مـــــــــــــزوج ومعاك اطفال يتـــــــــــعاون وامهم ام زينه حسينه ابن العم : لا زم ردف بش ودفـع لوالدك حق وفنــــــــون لو نخليش عندي عوينه في باديتنا السارحه تطفي القانـــــــــــــــــــون انتي ماانتي بنت المدينه العروس : ني مابغيتك قلبي بصاحبي بس مشطـــــــــون مابدا قلب يعشق ثنينه ابن العم : مابا يذوقش والله لو بايمـــــــد مليـــــــــــون بعد ذا اليوم لا تذكرينه العروس : بذكره دايم لو باحلف كذب وابكي شنـــــــون من حلف بايكفر يمينه ابن العم : بافص راسك حد القديمي معي مسنـــــــون والمخابيط وسط الخزينه العروس هنا تستنجد بامها ياماه ياماه دركني غارني الملعـــــــــــــون الام : ايش بك ياربيله فك الوليده اسر يالمهيون قبل لاعينك تشوف عينه لاجاء مخيزم والله يخليك تحته نـــــــــون بايخلي عظامك طحينه ابن العم : من هو مخيزم وانتي وهو ايش باتلقون شرط وقفه يوم الضعينه الام : فكيش منه خليه يهذي كما المجنـــــــــون يابنيتي يالله ضوينه ياطم خاطب قد صبح اليوم بالعـــــــــربون سلمه ابوش من غير شينه يوم الزواج ويسمى في الباديه يوم الربوط فياتي والد العروس ويرمي شال على العروس ويقول لها يافلانه انتي مربوطه لفلان . ولكن ابن العم ياتي ويعكر صفو ذالك الزواج . ابن العم : شــــــــــــل نفسك رفع ياذلقبيلي حبالك بنت عمي ولي وحـــــــدي ولاسيبها لك خلها لا تقاربها وخـــــــــــــــذ كل مالك العروس : بنت عمك حلالي اليوم ماهي حـــلالك قد رضت بي وحبيتني وكــرهت فعالك باخطمها وانته ســـــــــــرفعل مابدالك ابن العم : رح خطمها لا نته صـــــدق شفها قبالك انت مرفوق حسب السارحه والمسالك وان تقدمت خطــــوه شفك ميت وهالك مخيزم : نارجالي مــــــعي وانته بجنبك رجالك ان تباها تقع مانيننا شــــــــــــد حالك بس انا باصبر حشمه لعمـــك وخالك هنا تدخل الام وتنادي الاب لانقاذ الموقف الام : ولحق ولحــــــق ياعمر ودرك عيالك الهوى بايضويهم بحــــــــور المهالك بيسلكو الطـــــريق لي مايسلكه سالك الاب : يابني ايش لي جازاك وايش لي جرالك الهـــــــــــــوى مايفيدك رد عقلك تمالك لو تكلمت قبل اليوم بهـــــــــدي بها لك ولد العم : وانت ياعــــــــــم تتبعها وترضى بذالك انت راضي بغلمك تفترق اوجمــــــالك يدخل الاجنبي ويقاسمك في مــــــوالك الاب : صدق ماقلت يابن الخو وريض مقالك مـــــاخطرنا على بالي الذي هو ببالك الجنيبي يزول مـــــــــانت مابا زوالك الام : اوفي مخيزم الكلمه تعنا وجـــــــــالك عيب ياعمر في الميزان تنقص قفالك جامن الخون على شان بنتك اعتنا لك الاب : سارحة عمـــــــــــر جازتنا تلفظ بذالك سارحة عمر قالت اول قـــــدم عيالك يدخل احد الشوخ لحل النزاع ويقول شف خصال الجنيبي لا تشابه خصالك لا يعزك ولا يسرح مـــــعك في قتالك مخيزم : انت ياشيخ عادك لم تزل في ظلالك انت تفتي كانك بوحنيفه ومــــــــــالك هكذا غدرت بي ودخلت بي ليل حالك شل بنتك ولي مـــعكم خبر غير ذالك ابن العم : انتي مصنعه اليـــــــــــــوم بيدي قفالك صار لي حق جيلك من علاك او سفالك ان بطى او سرع لابد لي من حــــــلالك العروس : انت قـــــــــــد جيت بنيه للطمع ياخبالك انت مــــــــــــاتحبني انته بغيت الطبالك والنبي لارضي والـــــــــدي مابارضالك ابن العم : انتي زقره ولا لك شــــور عندي ولالك العروس : لا بغيتك ولا لي شـــــــــف نوخذ مثالك باصبر صــــــــــــــاحبي قير ولا بازلالك ابن العم : وين تبغين مني فيش انا اليوم مـــالك العروس : انت مخبــــــــول يامسكين تتبع خيالك لا يمينك علي تقـــــــدر وتغفل شمالك باســــــرح في جبال الله ماهي جبالك وفي اخر الاوبرت يقومون بعرض قرار منع الزواح من الثانيه وبهذا القرار تنجو البنت من الزواج من ابن عمها لكونه متزوج معاني بعض المفردات : شاوي : من الشاه راعي اغنام ضون : من الضان اي راعي ضان مثاوي : الحدود والمواقع سعاد الزبينه : مدينة الشحر مشقاصيه : المراه نسبه الى المشقاص كنينه : قهر البخص : ان تنقص من حقك قطع : البيع الرهينه : المال المرهون المرتجع بعد فتره العربون : جزؤ من الشي مقدماً لعون : من الطاعه بالدون : الشي الرخيص الثعر وابن الزبينه : اشخاص شجعان من قبلة الحموم ولهم قصه ماثوره في الشجاعه ردف بش : مرداف ثنائي فنون : هدايا من العريس لاهل العروس عوينه : مساعده مشطون : متولع شنون : الدمع الغزير بافص : اي بضغط القديمي : الجنبيه او الخنجر المهيون : الشي الهين الضعينه : ضعن العروس لبيت زوجها ياطم : من جمال وحسن الشي باخطمها : خطام الشي وتقوده مرفوق : موقوف حشمه : تشريف واحترام غلمك : الاغنام ريض : صحيح الجنيبي : الاجنبي سارحة عمر : العاده السائده في قبيلة الحموم وعمر عزوة القبيله يعتزون بعمر مصنعه : الحصن المنيع زقره : البنت الصغيره
| |
آخر تعديل بواسطة روح السراب ، 02-13-2017 الساعة 06:35 PM |
|
02-13-2017, 04:50 PM
| #16 | |
| رد : ديوان الشاعر حسين المحضار أوبريت بنت القبائل (منظر لمزرعة وفلاح يزرع فيها ويغني ) الفلاح : 1 أعشق أنا قريتي وأعشق هواهـا ،،، ،،، ،،، مايطيب لي العيش في قرية سواها 2 أطير في جوهـا ، والثـم تراهـا ،،، ،،، ،،،وأفدي بروحي خضاريهـا وماهـا 3 حب الوطن حب يجري في فؤادي ،،، ،،، ،،،وفي عروقي كما تجـري دماهـا ( تدخل بدوية وراءها أغنام ترعاها ) البدوية: من أنت قل لي ؟؟ الفلاح : 1 أنـــا فـــلاح قـــروي ،،، ،،، ،،،الي ذرى الأرض ذي والي سقاها البدوية: وايش تعمل هنا ؟؟ الفلاح : 1 أحــــرث وأســقـــي ،،، ،،، ،،،وأجني ثمرها وأكل من جناهـا 2 وأشرح عليها من الطير المعلّي ،،، ،،، ،،،وأنت جيتي من أين اليوم ياها البدوية: 1 أني من البادية رسلوني أهلي ،،، ،،، ،،،وأعطوني البهم يبغوني رعاها الفلاح : 1 ترعي بهن هاهنا في وسط أرضي البدوية: 1 ،،، ،،، ،،،مالقيت شي أرض في الوادي كماهها 2 والعفـو منـك إذا ضـروك بهمـي ،،، ،،، ،،،باشـل بهمـي وبـاروّح قضـاهـا الفلاح : 1 لا لا تروحين بس تمي بقربي ،،، ،،، ،،،وخلي البهم تعمل مشتهاهـا ( يمسك يدها وتحاول الابتعاد منه ) البدوية: عنيت منك الفلاح : وعنوش أيش يعني ؟ البدوية: 1 ،،، ،،، ،،،العنو ناقة وعربي فـي قداهـا 2 وعادني باتطلع باصيح في الزي ،،، ،،، ،،،باجيب لك بوي وأمي من خباها ( تصيح بأعلى صوتها ) 1 واعوه واعوه ياهوشي دركني ،،، ،،، ،،،وأباه وأماه بنتكم ويش بلاها ( يسمع الأب صوت أبنته فيستعد الفلاح بحمل بندقيته بعد سماعه لطلقات رصاص ويصل الوالد ) الأب : 1 ويش جاك يا الفسل تقبض يد بنتي ،،، ،،، ،،،حسبتهـا نافشـه محـد وراهـا 2 رجال من بعدها تسرح وتضـوي ،،، ،،، ،،،وخطيبهـا قيـم يتبـع خطـاهـا 3 بنـت القبائـل عزيـزة ماتدنـي ،،، ،،، ،،،لانسان بـدوي ينـزل مستواهـا الفلاح : 1 يا والد أسمع كلامي وانتصت لـي ،،، ،،، ،،،باجيب لك قصتي من مبتداهـا 2 بنتيتـك جاتنـي لمّـا محلـي ،،، ،،، ،،،وبهمها في المحل يمشين قضاها 3 غنت معي يوم شافتنـا نغنًّـي ،،، ،،، ،،،وبقيت تحكي وأنا اتسمع حكاها 4 وشاقني حسنها والحسن يسبي ،،، ،،، ،،،سبحان من بالمحاسن قد كساها 5 وعند ما طار معقولي وعقلـي ،،، ،،، ،،،طارت يداي ووقعت في يداهـا 6 وكان ياعم مقصودي وقصـدي ،،، ،،، ،،،نطلب على سنة المولى رضاها 7 نبغى صهارة تقع بينك وبينـي ،،، ،،، ،،،هل باتوافـق تزوجنـي اياهـا الأب : 1 فرّيت باللمس ، ياويلـك وويلـي ،،، ،،، ،،،ايش باتقول القبائل فـي قراهـا 2 بايلومونـي وبايهينـون قـدري ،،، ،،، ،،،وبايقولـون قـروي قـد خذاهـا 3 قضيت عل سمعتي وهتكت عرضي ،،، ،،، ،،،فضيحتي اليوم قد بلغـت مداهـا 4 قم أدفع العنو لي ناقـة وعربـي ،،، ،،، ،،،والا قتلتـك ولا بـاقـول آهــا الفلاح : 1 هذي خطط بالية ماعـاد تمشـي ،،، ،،، ،،،هذي خطط هـدًّت الثـورة بناهـا 2 ماعُدت ذاك الذي يشرُد ويقضـي ،،، ،،، ،،،أذود عن ثورتي وأحمـي حماهـا 3 حامل سلاحي ، دائماً فوق كتفـي ،،، ،،، ،،،والعلـم أميتـي الأولـى محاهـا 4 واليوم قانـون للاسـرة وعنـدي ،،، ،،، ،،،نسخة وأي مـادة لـك باقراهـا 5 يحـق للبنـت تتخيـر وتـبـدي ،،، ،،، ،،،للنـاس أراءهـا اللـي تـراهـا 6 إن كان تختارنـي وتريـد قربـي ،،، ،،، ،،،أنا كما اليوم حـس قلبـي يباهـا 7 وإن كان تختار بنتك شخص غيري ،،، ،،، ،،،تروح مع من تحـب والله معاهـا 8 والبنت ماهي جلب يرخص ويغلي ،،، ،،، ،،،ما يصح لك بيعهـا أو مشتراهـا الأب : ( يفكر برهة ) 1 تكلمي بالـذي تبغيـن نطقـي ،،، ،،، ،،،أيش باتقولين في ذا الشور ياها البدوية: 1 خافك إذا قلت تضربني وتقسي ،،، ،،، ،،،علي وتقول بنتي قـل حياهـا الأب : 1 لا لا تخافين بعد اليوم منـي ،،، ،،، ،،،هذي القضية أنا عقلي وعاها 2 وتخيري من تريدينه ويكفـي ،،، ،،، ،،،شوفي القضية تقارب منتهاها البدوية: 1 لا قدك راضي فلا بد ترضي أمي ،،، ،،، ،،،وماعلي بعد ذا في مـا عداهـا 2 تعال يا باه عالقروي عقد لـي ،،، ،،، ،،،حبته نفسي وأعطيتـه ولاهـا ( بعد الاتفاق ) الجميع : 1 أعشق أنا قريتي وأعشق هواهـا ،،، ،،، ،،،مايطيب لي العيش في قرية سواها انتهــــــــى معاني المفردات - العنو : عرف قبلي - العربي : بندق بو فتيله - في قداها : أي معاها - الزي : التجمع القبلي - الهوشي: مفردة لمناداة أقرب السامعين لها من القبيلة - النافشة : هي المرأة التي لا يسألها أحد أين ذهبت ، فهي بدون راعي - يمشن : يمشين وهي تنطق هكذا في العامية بدون الياء - الجلب : الماشية التي تجلب للسوق للبيع - خافك : خاف تأتي بمعنى ربما أو لعل في العامية الحضرمية وتضاف للضمائر فيقال : خافك وخافكم خافش والأصل أخافك واهيبك
| |
آخر تعديل بواسطة روح السراب ، 02-13-2017 الساعة 06:42 PM |
|
02-13-2017, 04:50 PM
| #17 | |
| رد : ديوان الشاعر حسين المحضار السلام عليكم ورحمة الله وبركاته من كتاب الشعر المسرحي للشاعر القدير حسين المحضار أخترت لكم هذا الأوبريت متمنية لكم الاستمتاع بقرأته ومتابعة عادات وتقاليد كانت ولازالت متبعة في(( الولادة والختان )) أوبريت ( الولادة والختــان ) من العادات والتقاليد الاولاد:= أيا إباءنا وأجدادنا = على الذكرى سنة مرت لنا سنة فيها قفلتم بابنا = وقد كنتم لنا نعم الرواة عدنا إلى العادات= من إخبار السنين الماضيات= عدنا إلى العادات= ***** تحفتونا بعادات الزواج = وضيفته العجيبة والحواج وماء ورده وعطره والدراج = وحلواته ولي هن قارات عدنا الى العادات= فايش اليوم معكم يا رواه = وما هو في دفاتركم نراه مسجل بالقلم هو والدواة = من أخبار السنين الماضيات عدنا الى العادات= ***** الآباء والأجداد:= نعم يا أبناءنا وأحفادنا = أتيناكم على ميعادنا وبانشرح لكم عاداتنا = إذا ما عندكم منها صفات عدنا إلى العادات= ***** زواج العام قد ولى وكان = واما اليوم قد ان الاوان الى وصف الولادة والختان = سوى كانوا عويله او بنات عدنا إلى العادات= ***** عروس العام حبلى ذا السنة = تعبر يومها متسهنة ملقت للمعرس ونونة = اذا شافته قالت هات هات عدنا إلى العادات= ***** وقالت امها بنتي فقاع = مسيكينة تظلي هاع هاع بغت حومر بغت واحد صباع = بغت كبدة بغت سكر نبات عدنا إلى العادات= ***** اذا ماجبت مطلبها يقين = علامة باتؤثلر في الجنين تقع في الفخذ والا في الجبين = وشرغة كم شرائغ عالمات عدنا إلى العادات= ***** وخل امك تعقبها قليل = وخلوا الحمل يعبرعا جميل وصاحي لا تحملها ثقيل = إذا عندك خواتك قاعدات عدنا الى العادات= ***** وبعض امات قالن بنتنا = بغيناها تلد في بيتنا وحيا بك متى ماجئتنا = ولكن سلم النفقة مئات عدنا الى العادات = ***** وام الزوج فتحت بابها = وقالت نحن ما نسخي بها علينا فرشها وعرابها = ودهلتها وكل الواجبات عدنا إلى العادات= ***** وقال الزوج سووا كل شي = وروونا انا ماهو على بسيط الجم عندي والشوي = مثيل الناس مانبغي الشمات عدنا الى العادات= ***** وقالت له بغينا كبش زين = يكون اسود وملقي خصوتين مساير ، حرز من حسده = ومن شر النفوس الحاقدات عدنا إلى العادات = ***** وهت عادك قعادة واطية= ومفرش للنفاس الغالية ومغطى فوقها وسباعية = جديدة والدبال إمعثكلات عدنا إلى العادات = ***** وعادك هات للسقلة مهد = سواء كانه بنية أو ولد ووطي الصوت لاتحكي لحد = وشف عاد الجنين الا حوات عدنا إلى العادات = ***** وهت عندي لنا من أجلها= لها بانقرب الدهلة لها ونحن في الحقيقة أهلها = ونعرف مدلب المتولدات عدنا إلى العادات = ***** علينا بانوصي في الصبر = وباتسحق هرد معنا ومر وعاد الكحل ينفع ما يضر =تفتح به عيون أمغمضات عدنا إلى العادات = ***** وبا نجيب الهضيمة والقرض = لبطن الطفل لاجاه المرض ولاشي شر لكن الغرض = يكونين الحواج مقربات عدنا إلى العادات = ***** وبانجيب اللبان الحاسكي = وشي ميطي وشي بدوي لكي من الشيطان ما بانشتكي = إذا قدها المقاطر عاكرات عدنا إلى العادات = ***** وبانجيب الضفيرة والضفير = ووصلة من ظوافير الحمير كذا المحلب مع المر الفطير = وعاد الورس يتفتفت فتات عدنا إلى العادات = ***** وبانوخذ عسل في مرمرة = وجبنا دهن شغل المعصرة وبانوكد تنعشر مقطرة = تكون امرنقات امخدرات عدنا إلى العادات = ***** وبانوكد فلانة محمية= ولابد من غريمة ثانية تكون امصالية ومربية = وتحضر في المظل هو والمبات عدنا إلى العادات = ***** ونبغى ثوب صافي للنفاس = يلقونه مع النفسة لباس ولا شي فيه قُدمة أو كياس = يعرفنه كثير امخيطات عدنا إلى العادات = ***** ونبغى صدر للطفل الصغير = ومسفر لاجل مايملى الحسير إلى ماقده عاد رجله يسير = ويعرف وين ظل وين بات عدنا إلى العادات = ***** ولا ننسى في الدهلة الحديد يبعد كل شر منش بعيد علىقول المحاكي والقصيد = ومن عجزان شؤم مخرفات عدنا إلى العادات = ***** وموجر للبن والا لخاه = ووصلة شاش نبغاها غطاه ومُتة برو نبغاها حقاه = وعاده دغو ماهو حق سبات عدنا إلى العادات = ***** بذلنا لاجلها كل الجهود = وكل غالي تقربه النقود ومايقصر على سالم عبود = يكمل لي الخصال القاصرات عدنا إلى العادات = ***** تحقق حملها زاد الظهور = ومرت كاملة تسعه شهور وفي ليلة سمعناها تثور = وحست بالولادة حين جات عدنا إلى العادات = ***** وزادتها المواصي والكهور = وقامت أمها تحضي البخور وفي ربشة كبيرة يا حضور = وتدعي بالحيا هم والموات عدنا إلى العادات = ***** نذيرة قرش لك يامرضحين = وربيةلاحمد باعوين إذا جابت فلانة طفل زين = وسلمت من جميع المؤذيات عدنا إلى العادات = ***** ونعمل أيه يا الله ياحبيب = ولاحد كان في البلدة طبيب ودار أمولدة ماهي قريب = تهنبع في الليالي المظلمات عدنا إلى العادات = ***** ونبت عا عجوزة امولدة = من اللي يعرفين القاعدة وباتوا في حياة أمنكدة = وكل يسأل الله الثبات عدنا إلى العادات = ***** وزادوا قفلوا أبوابهم = لاجل الناس لايدروا بهم يشلون الولادة حقهم =لان بعض الحريم املقلقات عدنا إلى العادات = ***** وجابن سبع حبات بن = وياراشن على القهوة رشن وقالن سر في القهوة لهن = ويروونه عن الناس الثقات عدنا إلى العادات = ***** ودهنن ظهرها بالزنجبيل = وساعة بالسليط النارجيل وسبر يقصر الليل الطويل =وصيحن الدياك أمنبهات عدنا إلى العادات = ***** وساعة أذن الله بالفرج = خرج لي عذب الأمة خرج مسمح مندري رأسه عوج = بغى له قسم في هذي الحياة عدنا إلى العادات = ***** ( يبدأ الطفل في الصياح )= وأذّن بوه في أذنه وقام = وصلى عالنبي البدر التمام وقاموا الناس لي كانوا نيام = وسمعوا الطفل يبكي وات وات عدنا إلى العادات = ***** وقطعوا الصر لي هو متصل = وبعد القطع بو سالم وصل وجاب الرأس ويده ترتقل = عليهم للولادة تضحيات عدنا إلى العادات = ***** حقيقة إنها جابت ولد = ولكن ما بغوا يحكوا لحد بغوا اللماه لي عليها العمد = إذا خرجت يرفعون الصُوّات عدنا إلى العادات = ***** وقامت وأخرجت لماتها = وجان أخواتها وعماتها وحجرن وأخبروا أهلاتها = وراحوا بشروا كل الجهات عدنا إلى العادات = ***** وخرجوا برع الدار يبحثون = فلماة الولد برَع تكون وبيضة فوقها وشوي دخون = ولابد من قليل اخزعبلات عدنا إلى العادات = ***** وشلو الطفل منها غسلوه = وبالمر والصبر قد خططوه وجاءوا بالعسل به حنكوه = وبعد قليل جن المرضعات عدنا إلى العادات = ***** وشلّوا الأم ماها قد حِمي = وحطّوها في الجفنة شوي ومسحت بالهرد والمر في = وجنها والعيون امخططات عدنا إلى العادات = ***** ولبست ثوبها ذاك الجديد = وهم كلين ماسكها بايد واعطوها شريم أعوج حديد = وشلوها لميد الزايرات عدنا إلى العادات = ***** وصرّوا بطنها بالغرو صر = وهذا الغرو اصله من شعر وقالوا ما يسبب شي ضرر = ولكنه يشد الرابخات عدنا إلى العادات = ***** وراح الزوج تو جاء بالعصيد = وهوفرحان مستبشر سعيد بصحة زوجته وابنه الجديد = ومدت يدها شلت فتات عدنا إلى العادات = ***** وقد نصبوا القعادة والفراش = وقالوا هذه الفوطة غطاش وذا ابنش على المفرش معاش = أنتبهي من بنش خلي الستات عدنا إلى العادات = ***** وجاءوا الناس بيهنونهم = ثلاث أيام شمة عندهم خُت الموت الولادة قولهم = ولي ما جاء شروعه قاصرات عدنا إلى العادات = ***** ومرت سبع أو مرت ثمان = وقالوا اليوم ذه معنا ختان ونبوا عالاقارب للمكان = وعاصهراتهن هن والخوات عدنا إلى العادات = ***** وجا الخاتن وختنوا الولد = زذبحوا رأس والعاصد عصد ولقّوا بسط وغذا ما يحد = يحبون الخسارة والفوات عدنا إلى العادات = ***** وخرجوا الروع والقرع بفن = على اسم الطفل بـيسموه من وماجاءت به القرعه حسن = يراعون العقيدة والنيات عدنا إلى العادات = ***** ونفسة حددودها أربعين = وهي متعقبة والقوت زين وتذكرها على طول السنين = إذا جاعت وحست بالسنات عدنا إلى العادات = ***** وان جابت بنية لا تخاف = ولكن بعد حبوها أهلها ولا شافوا الولد قط مثلها = بنات أبليس هن متحكويات عدنا إلى العادات = ***** وهذا اليوم غسّوا للنفاس = وقدها لابسة أحسن لباس وهنوها وعزموا بعض ناس = وبعض العصر جان أمهنيات عدنا إلى العادات = ***** إذا غسّت من النفسة خلاص = فلانة مالها تمييز خاص من الليلة عليها الزوج فاص = وتعمل مثل كل العاملات عدنا إلى العادات = ***** وهذا ما قدرنا نجمعه = وماكنا نراه أو نسمعه وإن شي ما وقع في موقعه = بن أدم قد تخونه الذكريات عدنا إلى العادات = ***** من أخبار السنين الماضيات= عدنا إلى العادات = أنتهــــــــــى=
| |
آخر تعديل بواسطة روح السراب ، 02-13-2017 الساعة 06:44 PM |
|
02-13-2017, 04:51 PM
| #18 | |
| رد : ديوان الشاعر حسين المحضار كـــــذابين كــــذابين مـــا حبهـم لله والـــدين الا لمقصد دني مـــــعهم قضيت أسنين وأصبحت ذلحين كافربمن له ضنين كــــذابين ***************************************** مما طله منهم وروتين ووعـــود ماتنقي مــــا للكلام تثمين خابـو مســاكين هم في الهوى خاسرين كـــــذابين **************************************** لقنتهم عالعهد تلقين ومســو يعيبــــون بي قلنا ســــوى امين العهد ســـــكين في نحر من بايخين كـــذابين **************************************** ضحكو على عقلي عقلي مسيكن ما فاز منهم بشي يتلـــونو تلـــوين مثل الثعابين لي في الثرا بايبين كـــــذابين ****************************************** مــروتي معهم في الطين وجميلي الاولي لـــو عا ملــوني حين بالعطف والين عا ملتهم من سنين كــذابين
| |
آخر تعديل بواسطة روح السراب ، 02-13-2017 الساعة 06:49 PM |
|
02-13-2017, 04:51 PM
| #19 | |
| رد : ديوان الشاعر حسين المحضار أشكي لمن منك ومن لي تفعله أشكي لمــــن كـــــم صحت في أذنك وكم راسي توطى لك ودن الحب لـــه اسلوب لو تدري وفن يعرفه كل فنان يا قمـــــري البان المولع ماسكن يا قمري البان ********************************************* مـــا خاب في ظنك لا ني فيك عندي حسن ظن دائم ســــأل عنك والقى في غــابك كل عـــــــن وانته تــــدور للمشقه والوحن في غالب الاحيان يا قمري البان المولـــع ماسكن يا قمري البـــــان ********************************************* يـــا مـــن كمل حسنك وفعلك دوب لي ماهــو حسـن يــــا مــن غمض جفنك جفوني للكرى بعدك جفـن أمسي سمير النــجم من طول الشجن وانت بلا اشجان يا قمــــري البان المـــولع ما سكن ياق مر البان *********************************************** هــــــل غاب عن ذهنك كلامي لك من العاذل ذهن لي مــــاعرف وزنك ولي هو في كلامه ما وزن ذلا يطبل لك ويفقــــــع لك بشن من اجل يقضي شان يا قمـــــري البان المولـــــــع ما سكن يا قمر البان ******************** معاني بعض المفردات : توطى لك : اي انحنى المشقه : اي التعب ذهن : اي انتبه يفقع لك : اي يضرب لك الطار شن : الجلد القديم يسمى شن او شنه
| |
آخر تعديل بواسطة روح السراب ، 02-13-2017 الساعة 06:47 PM |
|
02-13-2017, 04:51 PM
| #20 | |
| رد : ديوان الشاعر حسين المحضار يا سهران يا سهران ليه السهر مالك فوق فرشك مقر تتذكر زمانك عبر حيا الله ذاك الزمان يا سهران اهدأ ونعم قلبك لا تحمله هم المكتوب واللي انقسم بيأتيك من حيث كان ياسهران لي فيك عاب لا تطرحه ضمن الحساب كم من نجم ولى وغاب مابينت منه بيان يا سهران ذا عاد ليه تتساءل وتسأل عليه أو بالعين تنظر اليه أو ذكره يمر عاللسان | |
آخر تعديل بواسطة روح السراب ، 02-13-2017 الساعة 06:47 PM |
 |
| Bookmarks |
| الكلمات الدلالية (Tags) |
| ((ديوان , المحضار)) , الشاعر , الكبير , حسين |
| Currently Active Users Viewing This Thread: 1 (0 members and 1 guests) | |
| |
