كم سؤال

11-01-2013, 05:29 PM

جاني واحد قال : بسأل كم سؤال
وقبل يسأل قلت : أنا ماني خبير !

قال: جاوب بس , يا ولد الحلال
وكل كلمه حِطَّهَا .. فبيتٍ صغير

قال نبدي :ماهو تعريف المُحال..؟
قلت :خَل الكلمه فـ الشطر الأخيـر ..!

القهر : إن شفت دمعـات الرجال
والوطن : ( إنسان ) .. مِتغيِّر كثير

والطفل : لعبه على شاطـىء الرمال
والأمل : إحساس في عين الضرير

الوفا : [ قلبين ] .. يجمَعهُم حلال
والرَجُل : اللـي علـى أهلـه يغير

والــرجــا : لا قلت : للواطـي تعال
والفشل : مدري .. ولكنـه مرير

و الــغــلا : إحساس إلى حَـد الخيال
و العِشِق : لا شفت مَعشُوقِك يطير

و الجفا : إعكس مفاهيم / الوصال
و الوَصِل : يعنـي تأكَّـد فيك خير

و العقل : تِسْفَـه أقاويـل الجهال
و الجهل : إن قلت عن نفسك كبير

و الخطر : لا صار ما عندك مجال
و البلا : إن صرت معدوم الضمير

و العجب : لا صرت تسأل مين قال
و التعب : إن كنت تِبْحَثْ عن مصير

الغنى : بالنفس ما هو راس مال
و الفقر : من كان .. بأعماله فقير

يكفي يكفي .. أسئله إنهي الجدال
ويالله علمني عَن .. السِّر الخطير

ما أبي تضرب لي في غيرك مثال
قول : عنِّك وإعتبر سِرِّك في بير

جات طعنـه مِن جنوبك والشمال
يعني وضعِك بين مِن حُولك خطير

صاحبـي وإن ضاقت بعينك ليال
لك فرشت القلب مفروش الحرير

وما ألومك .. كان شدِّيت الرحال
دام بيتك جرح / وفراشك حصير

هذا تعريفي إلى كلمة : مُحَال
شي ودِّك فيه ولا يمكن يصير ..!