تحدر سيوله

بخير , سدوله

تحدر سيوله

((( تحدر سيوله )))

حط القنيف اللي ترامع بروقه
سايق مثاره واغرق القاع من ماه

تدوي رعوده والمناشي تسوقه
كنها تبشر به مخايل لمنشاه

يالله عسى غر السحاب الصدوقه
تبطي حجايرها من اقصاه لا اقصاه

عن كل ضامي تشرب الما عروقه
وتحدر سيوله مع كل ماطاه

السيل تحته والمثاوير فوقه
رايح سواده كنه الليل يغشاه

يا فرحة اللي قطع القلب شوقه
قل الكلاء حاديه والقيض يحداه

يا جاهل الدنيا تراها سروقه
تسرق سنين العمر وتعد ممشاه

الايام تمضي والليالي سبوقه
والموت لا جا مامن الموت منجاه

منبع الشعر
عبدالله عزام الحارثي

أبيات جميلة وجزلة
فيها روعة التعبير والحكم والفوائد
صح لسانك شاعرنا القدير
وننتظر كل جديد..

يا جاهل الدنيا تراها سروقه
تسرق سنين العمر وتعد ممشاه

الايام تمضي والليالي سبوقه
والموت لا جا مامن الموت منجاه


صح الله لسانك وعلا شأنك ابيات كلها عقل وحكمة
فيها من العبرة الكثير، تكتب بماء الذهب

تحياتي ،،

الله الله صححح لسانك وليس غريب عليك ابيات من ذهبتقبل مروري المتواضع

مروركن الاجمل وصحت بدانكن ولا عدم ولا خلا