امثلة وحزاويها

امثلة , وحزاويها

امثلة وحزاويها

سلام الله عليكم

اكيد انكم قد سمعتو بالامثال الشعبيه الحاليه خلوني اليوم احازيكم واقل لكم قصه كل مثل


( لا لي ولا لك ولا للبطاط )

كان به مره صنعانيه تنحه قوي وخجفاء ومن ما حاكها صدقت ,, وقد ماتو ابوها وامها زمان وفي يوم من الايام كانت في البيت وزوجها كان في عمله فدق باب البيت واحد دجال خريط كذاب المهم سارت تفتح له الباب فقال لها : انتي فلانه بنت فلان وامش فلانه بنت فلان , فقالت : ايوه , قال لها : ابوش وامش عيتعرسو اليوم في الجنه ويشتو ملابس العرس والزفه , قالت المره الخرفه : صدق , ماعذر مادي لهم احلى ملابس وقامت تحجر وليليليليلييييي غر قل لي لو سمحت من انت ؟؟ قال الدجال : انا مزين البلى

( والمزين : هو الحلاق وكان زمان المزين او الحلاق هو اللي يخدم العرس ويجهزه ويجهز العرسان )
( والبلى : الموتى )

فقالت له : راعي لي شويه هوذا عد اسير وارجع
وسارت تجمع ملابس في صرتين كبار او بقشتين كبار لداه وملابس واحده فيها ملابس ابوها والثانيه ملابس امها ومكنت الدجال , والدجال جرهن وفحط وبعدها بقليل جاء زوجها من العمل قدو تاعب فلما فتحت له الباب قالت له : قل لي جنه , قال لها : للمه , قالت له : اول شي قل لي جنه , قال لها : جنه لش , قالت ابي وامي عيتعرسو في الجنه , الرجال طنن قال لها : كيف ؟؟ , فحكت له الحكايه كلها
فصاح وغور وبهذل بها وسمع بها خلق الله وقال لها : انّا من زد خرجتي يامرتي .. انتي غبيه تنحه من ما حاكاش صدقتي .. قد ماتو الخبلان زمان .. هيا قومي قومي جهزي لي الحصان انتي وهذا الوش
فقامت مرته جهزت له الحصان وطلع زوجها فوق الحصان وعشق الرابع وفحط لما ابسر الدجال من بعيد وفي يده الصرتين اي البقشتين , والدجال قفى وابسر زوج المره اللي ضحك على عقلها وفكر بسرعه كيف يفعل بروحه قبل مايوصل لاعنده وفجاءه شقص الدجال رجال اصلع بيحرث في حقه الارض جنب جبل وجنب الرجال الاصلع كومه تبن يعني قش فقرب الدجال لاجنب القش وخبى الصرتين فيها , وقال للرجال الاصلع : ياخبير انت بتبسر ذيك الرجال اذي فوق الحصان , انت داري منو ؟؟ , قال الاصلع : ماشي منو ؟؟ , قال الدجال : هذا رجال مرسل من عند السلطان بيفعل من راس الناس الصلع بطاطه

( المقصود بالبطاط هنا اناء مصنوع من الجلد كانو يفعلو فيه زمان صليط او زيت )

فكان الرجال الاصلع هذا غبي قوي واتنح من المره فقال : يوه وذلحين مافعل !! , قال له الدجال : ابسر ما معك الا انك تهرب فوق الجبل ذيه وهو ماعيقدرش يوصل لاعندك لانه فوق حصان ,
وخبيرنا الاصلع صدق وهرب فوق الجبل , ولما وصل زوج المره الاخجف لاعند الدجال وقف وساله : مابسرتش ياخي رجال في يده صرتين ؟ , قال الدجال : الا ابسرته ذلحينه اهه وهو هاربي فوق الجبل ,
فقال زوج المره : فوق الجبل !! بس ماشقدرش الحقه لافوق الجبل وانا فوق الحصان
فقال الدجال : اسمع , اطرح الحصان عندي وانا شانتبه له امد تلحق السارق لافوق الجبل
رد زوج المره : شكرا ياخي بس لو سمحت انتبه له امانه , قال الدجال : ببب ولاعليك ابشر
المهم طلع زوج المره الاخجف فوق الجبل وجلس يلاحق الاصلع ,, فلما ابسره الاصلع بيلاحقه تاكد وصدق انه بيلحقه علاسب يفعل من راسه بطاطه ,, ولما قد زوج المره قريب من الاصلع قال بصوت عالي : هات واحده وجر واحده ,, هات واحده وجر واحده ( طبعا بيقصد جر لك بقشه وهات لي بقشه )
والاصلع كان يضرب على راسه ويقول : والله مامعي الا هذه ,, والله مامعي الا هذه
وفي النهايه وقف الاصلع وجر حجر كبير وبدا يضرب صلعته بالحجر وهو بيقول : لا لي ولا لك ولا للبطاط ,, زوج المره استغرب قوي من الاصلع وقرب لاعنده وساله ,, والاصلع حكى له ,, ودري زوج المره ان الاصلع مشو الدجال اذي ضحك على مرته وفهم ان السارق الحقيقي هو الذي طرح عنده الحصان فنزل بسرعه فجاء يبسر السارق وقدو فوق الحصان بيحمل وقدو بعيد ماعد يقدرش يلحقه والصرتين معه فوق الحصان كل صره على جنب واخيرا ايقن انه مش بس مرته والاصلع طلعو احمره لانه طلع هو والكل احمر منهم ,, فروح البيت وقدو تاعب ضابح عيجنن وخازي مشو داري مايقل لمرته بعد ماقد بهذل بها وصيح فوقها بسبب الصرتين فماعتقل له مرته حين ضيع الحصان ,, فلما وصل وفتحت له مرته الباب قالت : هيا مافعلتو ,, قال لها : لقيناه وطلع مشو خراط وكلامه كله صدق ابوش وامش عيتعرسو وزفتهم يوم الخميس وماكنش معاهم حصان فاديت لهم حقي الحصان

خخخخخخخخخخخخ ( زادو عليه مرتين )



مادح نفسة كذاب


كان به اثنين اصحاب كانو بيخطو في الغابه وواحد منهم كان كثير هدار وزناط ونصه نخيط وهنجمه ويازعم انه عفط قولته ويقدر يصتاط الاسود والحنشان ومايفتجعش من الجن ,, والثاني مسكين وهادى لابيتحاكى ولابيدي نخس ,, وبعدا وهم خاطيين لقيو دب يشتي يهجم عليهم ,, فاخونا العفط افتجع وفحط والثاني المسكين قرب لاجنب الدب وشتمه وصيح فوقه ,, والدب خطي ورحله ولافعل به شي ,, وبعدا رجع الهدار العفط بيسال صاحبه وقال : ايش كان بيقل لك الدب
رد عليه المسكين : ان مادح نفسه كذاب


هذا علمي ولاجاكم شر